دوّر على مكان راحتك! - ريـمـون سـامـري

وأنت مبسوط.. فرفوش.. ناجح.. معاك فلوس.. مشهور.. بتعرف تمثل إنك أخر منجهة.. نجمك لامع عن استحقاق أو لأ..

هتلاقي اللي حابب يكون جنبك.. وكل واحد له أسبابه.. أو احتياجه..

لكن لو عكست كل اللي فات..

بقيت بتعبر عادي عن حزنك.. ضيقك.. احتياجك في بعض الأوقات إنك تكون لوحدك.. مش عايز حواليك دوشه كتير وإن حد يدخلك في أمور جانبية ملكش علاقة بيها..

بقيت منطفي لفترة من كتر المعافرة.. وبتحاول تستعيد سلامك الداخلي..

هتلاقي اللي بيبعد بسبب ومن غير.. واللي شايفك كئيب..

واللي كان موجود و مصلحته قضيت ولقيت معاملته اتغيرت معاك لأنه شخص انتفاعي معاك ومع غيرك..

وتبتدي فعلًا تكتشف موقعك الحقيقي من الحياة ومن اللي حواليك.. علشان كده فلترة العلاقات كل فترة شيء مهم..

أفتكر من كم سنة حد قالي جملة..

من فترة للتانيه لازم تفتعل مشكلة علشان تشوف الوشوش الحقيقية للي حواليك.. وإيه اللي جواهم ناحيتك..

لأن الحقيقة عمرها ما بتظهر في الأوقات الحلوة..

حرفيًا.. حاول تدوّر على مكان راحتك فين..

واِبعد عن أي حد أو شيء بيحسسك بتوتر..

لأن الحياة بقت مرهقة أكثر من اللازم، ومبقاش

في لا سبب أو طاقة للاحتمال!

#ريمون_سامري